MALAGASY MANKANY
Eny hoy aho Ramalagasy
Malagasy be fivoarana,
Tsara haingo, tsara vatsy,
Tsara sampy, tsara anarana.
Izato fihetsiketsikao e !
Izato fomba amam-piteny,
Ianao no tena “Malagasy” fa tsy ireny Ntaolo ireny
Satrinay hitsinjo ihany
Izato ianao mirehareha ;
Borizanom-pandrosoana, miedinedina fandeha.
Soa manko nitanila ilay Rafotsibe nidraiko
Ka nanajanaja hoe:
mandehana sombiniaiko !
Soa fa niato kely koa, Rangahy
Ilay antitra efa goga,
‘Zay nisatroka haibano
Sy nitafy lamba soga,
‘Zay mivimbina entan-kely
Toa tsy zakany sahady,
Ka nihoaranao malaky
Tsy nanaovanao azafady
Taitra ihany Ingahibe
Nahita anao nivatravatra,
Ka nitraka moramora nefa dia namihin-tratra ;
“Eny…, hoy izy velon-tsento
… mafy zany ka tsy toha…”
Saingy ho aiza moa ny tena,
Izao no Gasy tafafoha
Tafatombina Rangahy
Zary lasa kaodikaody,
Iny koa niserana azy
Tovovavy be lamaody,
Irony ilay mitentin-doko
Sy mibory volo irony,
Sady tsy mitafy lamba
Tsy miteny gasy intsony
Dia indreny koa nandalo
Mpiara-dia mifampitantana,
Ankizy lahy sy ankizy vavy
Amin’ny tena fisandratana,
Moa va tsy mpivady mihintsy?
Amin’izato fombafombany?
Kinanjo tsy izany loatra
Raha natao ny tombatombana.
Nantenain’Ingahibe
Fa mba hanaja ireto zaza,
Nefa loza no nataony fa nifampikitika aza.
Dia nifampikimokimo,
Ndeha hiserana handika
Ingahibe no niarahaba ireto zana-kavantsika.
Eny hoy aho Ramalagasy,
Malagasy be fivoarana
Tsara haingo, tsara vatsy,
Tsara sampy, tsara anarana.
Tsy hanozona ny Ntaolo
N’inona n’inona natao,
Saingy masina ny sata
Izay voahitsakitsakao.
RANDZA ZANAMIHOATRA
efa potika ny kolontsaintsika malagasy, tsisy hevitra intsony, satria diso mahantra loatra.
Mila mifoha tanteraka ka mamerina indray ilay atao hoe fanjakan’ny madinika, na miverina @ socialista ny fahitako azy ary mandrava ilay rafitra natao ho an’ny mpanambola. Jereo ny sinoa, manana kolontsaina matanjaka be izay no mahatonga azy ho 2em puissance mondial.
Ndao, ianarana eh
Novambra 10th, 2009 at 5:03 pm