(Elie Rajaonarison, by Faribolana Sandratra)

RESAKAY SY DADA

– Ary Izy hanontany…
– Ho TSIA ny valin-teninao, ary tsy ho hitanao ny fony raraka amin-tany
– Koa raha mitomany Izy
– Ilazao fa ny Fitia toy ny vato mikodia, tsy voafefin’ambozizy..
– Ary ianao moa hanadino?
– Tsy hanadino fa…hamoy.  Ny hiranay hono hoe kaloy,  ny Fahatsiarovanay… fihino.
– Ary tsy ho hitanao ny masoko manganohano.

**********************************

HETRAKETRAKA

Misy maso tsy hitanao fa mijery anao ihany
Misy fo tsy tsapanao fa mitempo anao mangina
Misy saina tsy arakao fa misaina anao hatrany
Misy tia tsy fantatrao fa mandray anao ho tiana
HETRAKETRAKA

Misy olo-maninao, mankahala anao tanteraka
Misy endrika tianao, tsy nahalala anao akory
Misy fo hirifanao, milefa anao ho gina reraka
Misy nofy maminao, saingy rehefa ianao matory
HETRAKETRAKA

Misy sento indray mitosaka nefa tsy mba miomban-day
Misy maso indray mitopy nefa tsy mba mifanena
Misy tanana mitsotra nefa tsy mba mifandray
Misy tiana sady tia nefa miandry, mihenahena
HETRAKETRAKA

Misy fo te hifangia fa somparan-tsy hiaraka
Misy fo fanahy miray fa didiana hifampiery
Misy tana-mifandray fa dia misy mampisaraka
Misy aina roa ho iray fa sarahina an-tery!
HETRAKETRAKA

**************************

HITENY AHO,  HITENY

hiteny aho, hiteny
fa eny rehetra eny
toloko-mena fify, miafitr’eny imason’
ny zaza tsisy reny
fa eny rehetra eny
mangidy tora-jofo misosok’eny an-koditry
ny zana-drenireny
mangidy mialin’andro
tsihifiny isan’andro
fa tsy mba mety ritra…

hiteny aho, hiteny…
tsy miaina izany ianao
mangidy maizin’andro
mihantona eo am-bozon’
ny olona voaozona
tsy miaina izany ianao
mangovitra isan’andro
mifezaka isan’ora
sao voan’ny taingim-bozona
atelin’ireo trozona

tsy hiaina izany ianao
tsy hiaina izany mihitsy
mangina mahamanina ny ao an-tranonao
madio no sady manitra
kanto sy milamina
voatemotra hira faly mandrotsy nofy mihanoka
ny lalam-piainanao

dia tsy henonao akory ny hiaka am-perin’adin’
ny zaza menavava
nateraka hijaly
de tsy henonao mihitsy ny sentom-pitrapitran’
ny zana-dravahoaka
resy tsy afa-niady…
tsy henonao fa reko
hodianao mody fanina
k’izany no hitenenako…
sao aho… mba henonao

********************

NAMANA!

Namako iny ianao
rehefa injay mitsiky
raha sendra mifanena

Namako eny ianao
raha toa mamikiviky
rehefa injay aho resy
voageja an-katerena…

Namako hono ianao
f’isika tsy nahita ny volana niràtra
f’isika tsy nandre ny hiran-doharano
kanefa tena iray
fa nihaona teny ho eny ny foko sy ny anao
raha mbola tsy hary akory izao tontolo izao…

Namako any ianao
mahita izay mba tsapako anaty zavozavo
mitsiky an’eritreritra rehefa injay aho fa ravo
mikalo am-betsovetsoko rehefa manimanina
dia miaraka mirona rehefa samy fanina…

Namako eny ianao
fa hitako aminao ny Lanitra Maraina
f’ianao na eo na tsy eo
hatrany ao an-tsaina!

*******************

FIRST OF AUGUST

…hilaingo inona
eny an-tandroky ny omby tsy folaka
Voronkely dia tsy hary ho finandrika
miandra morona hitodian’ny nofiny
nofim-boronkely mihiaka ny hamaky Lanitra
tamana migoka ronono tondraka hariva
…

feno vanjampitia naotriky ny ela ny Nofiny
mba isan’ireny ve ny amboa-ditsoky ny Ombimanga
hariva dila kijana ka mireny hanonon’ny somondrara
ombay mila ny angola-doleviny
fa izy ho dotra manginan’ny dona misesy
tsy kiry fa zirimpitia mangoratsaka !

hilaingo inona
eny an-tendron’ny hambo tsy folaka
Voronkely dia tsy hay ho finandrika
miandry morona hifolahan’ny nofiny
nofim-boronkely misioka mamaky Hanitra
ny vonimpitia ela niotrika am-pon’ny Johary
…

mijijy lokanga tsara didy ny Hariva hidify
hanahanam-pitia feno fatra ny hiran’ny Maraina
mangorintsina Angola-dolevy ny morona hiarahany mitosy !
******************************

REDY ROVITRA

fantatrao ny fahalemeko
fantatrao fa … ho inonao
ny Lanitra iny nofefeko
ho kianja fihasinanao

…

fantatrao ! fa ho inonao
fantatrao ny firedeko
fantatrao fa … ho anao
ny Tontolo efa nekeko
ho kilalao an-tananao

…

fantatrao … fa ho anao !
mitosaka mangina ny Alina
eo imasonao ny angola
maninteraka Fanahy

miposaka mangina ny Alina
satry foana hijery anao
Fitiavana natao ho ahy

fantatrao ny fahalemeko
fantatrao … Fitia adala
miredaka tsy hay fefeko
tato am-poko namanala

fantatrao … adinonao

******************

ONY, ONJA …

Mavamavana fitopy
ny saha eo amin’ny mangiran-dratsy
kintana iray mitsilopy
iry mampivolon-dronono ny faravodilanitra
mampitsiky ny andon’ny maraina eny amin’ny felana

Niainga aho
taratra manjavozavo ho faty no niarahaba ahy
teo an-tokonana volana maloka endrika
misioka eny an-tsefatsefaky ny rantsan-kazo miaina ngolingoly
miarina malaina ny ahitra nolalovako
nanintsana ny lamba fotsiny efa kotsa
izay nitaika toy ny avandra ao an-tafontrano
ka nanontany ahy hoe: “Ho aiza ?”

Nivelatra feno tsiky namoaka hanitra ny voninkazo
mifanatsafa amin’ny feo kasoka sy mailaka
ary milaza amim-pitsikiana hoe: “izaho no telomiova
izaho no vervena, izy no voninavoko …”
nifampiantso ny loko: “Nahoana no milofika
hoy ny zozoro maitso tamin’ny laingomena ?”
“Nilaozan-tiana e! manisa ny andro hihaonana
ka manimbolo ny rivotra”

Niato aho
nitsapa tamin’ny heriko manontolo ny fetran’
ny hasambarana kobonin’ny felana mirana
sy ny fotoana mandalo mamerovero
toy ny irak’anjely eo amin’ny alina
nanontany ny alinkely nilampy teo amin’ny mamatonalina
sy ny tanambokovoko fotsy nanelatrelatra
teo amin’ny tany foana manjepizepy:
“Nankaiza ny tiako, aiza ny tiana …”

__________________________________

“Ry Rainay izay any an-danitra
Mijanona any
Ary izahay dia hijanona eto an-tany
Izay indraindray mba manja ihany”

(Extrait de la Traduction de Pater Noster de Jacques Prévert par Elie Rajaonarison et Ranoe)

__________________________________

 

Ah ! ry tsy misaina,
imamoako ny fanantenana.
Mamo aho,
avelao aho ho mamo,
izaho irery
sy ny Finoako
ary ny fanantenana.

Ho inonao ny fikarainkon’ny maraina,
Raha tsy tsapanao ny fameroveron’ny alina !

 

Ah ! l’insensé,
je m’énivre dans l’Espoir.
Je suis  saoûl,
laisse-moi me saoûler
seul
Avec mes convictions
Et mes Espérances.

Que t’importe les stigmates du matin,
si tu  ne sens l’essence de la nuit !

 
In- “Ranitra”

 

MANDRIA AM-PIADANANA  Elie !